លោក មាស រិទ្ធី អគ្គនាយករងស្ថានីយ៍ទូរទស្សន៍ហង្សមាស ថ្លែងប្រាប់ភ្នាក់ងារវីអូឌី(VOD)ពាក់ព័ន្ធនឹងបញ្ហានេះថាដោយសារលោក ម៉ៅ ហាជី មិនចូលខ្លួនដោះស្រាយ ពេលនេះហង្សមាសបានសម្រេចឲ្យមេធាវីដាក់ពាក្យបណ្ដឹងទៅកាន់តុលាការក្រុងភ្នំពេញ។ លោកថាតុលាការនឹងចេញដីកាកោះហៅបេក្ខជនរូបនេះក្នុងពេលដ៏ខ្លី ហើយបើនៅតែមិនព្រមចូលខ្លួនដូចអ្វីដែលខាងហង្សមាសព្យាយាមទាក់ទងទៅមិនបានសម្រេចទៀតនោះគឺចំណាត់ការចុងក្រោយនឹងចុះចាប់ខ្លួនតែម្ដង។ លោកថានៅក្នុងបណ្ដឹងនោះ ហង្សមាសបានកំណត់លើការទាមទារឲ្យម៉ៅ ហាជី ដោះស្រាយបទល្មើសទៅលើCambodian Idol ដោយកំណត់ឲ្យសងជំងឺចិត្ត។ លោកនិយាយថា៖ “យើងទុកពេលឲ្យគាត់ច្រើនថ្ងៃហើយ ប៉ុន្តែលទ្ធផលហាជីនៅតែបិទទូរស័ព្ទ ហើយបើលើកទូរស័ព្ទគឺគ្រាន់តែដឹងថាហង្សមាសបិទចោលតែម្ដង ឥឡូវយើងអត់ទុកអញ្ចឹងទៀតទេ គឺហង្សមាសបានដាក់ពាក្យបណ្ដឹងហើយ ដោយស្នើឲ្យតុលាការអនុវត្តដីកាកោះហៅ ឬចុះចាប់ខ្លួនដើម្បីឲ្យមកដោះស្រាយតែម្ដង អត់ទុករឿងអញ្ចឹងកើតទេ!”។
ខណៈដែល ម៉ៅ ហាជី នៅតែមិនព្រមចូលខ្លួនដោះស្រាយ តំណាងរបស់ហង្សមាសបានអះអាងថាខ្លួនបានដាក់ពាក្យបណ្ដឹងតាមរយៈមេធាវីទៅកាន់សាលាដំបូងរាជធានីភ្នំពេញហើយ ដើម្បីសុំឲ្យតុលាការកោះហៅបេក្ខជនរូបនេះឲ្យមកទទួលខុសត្រូវចំពោះកំហុសឆ្គងរបស់ខ្លួន។ មន្ត្រីហង្សមាសបានអះអាងថាហាជីនឹងត្រូវសងថ្លៃជំងឺចិត្តច្រើនម៉ឺនដុល្លារជាថ្នូរនឹងការគេចចេញមិនព្រមចូលខ្លួនដោះស្រាយ ក្នុងពេលហង្សមាសបានទុកឱកាសឲ្យចូលមកបកស្រាយច្រើនលើករួចទៅហើយ។
លោកបន្តថាលោកម៉ៅ ហាជី នឹងត្រូវកំណត់ឲ្យសងជំងឺចិត្តលើសពីម៉ឺនដុល្លារ ប៉ុន្តែគេក៏អាចទទួលឱកាសរួចខ្លួនផងដែរ បើគេសារភាពបែបណា ធ្វើឲ្យលោក អ៊ឹង ឆៃងួន អគ្គនាយកទូរទស្សន៍ហង្សមាសមានការយោគយល់។ លោកមានប្រសាសន៍ថា៖ “ឥឡូវហ្នឹង ហាជីគាត់ហួសពេលមកសុំទោស ឬបកស្រាយហើយ គឺមានតែផ្លូវមួយគត់ត្រូវដោះស្រាយសំណងនិងទទួលខុសត្រូវផ្លូវច្បាប់ ប៉ុន្តែយើងមិនមែនដាច់អហង្ការទេ បើគាត់ពន្យល់យ៉ាងមិច ទទួលខុសត្រូវយ៉ាងម៉េច ឲ្យលោកអគ្គនាយកគាត់អត់ឱនឲ្យបាន ក៏នឹងមានផ្លូវដែរ ព្រោះហង្សមាសអត់ចង់ធ្វើបាប ឬគាបសង្កត់គាត់ទេ ព្រោះយើងដឹងថាគាត់ចេញពីគ្រួសារបែបណា!”។ លោកថាទង្វើគេចខ្លួនរបស់ម៉ៅ ហាជី គឺជាហេតុផលធ្វើឲ្យហង្សមាសឈានដល់ដាក់ប្ដឹង ដោយលោកថាបេក្ខជនរូបនេះមើលស្រាលចំពោះមន្ត្រីទាំងអស់របស់ហង្សមាស។ លោកនិយាយថា៖ “មួយរយៈហ្នឹងហង្សមាសទុកឱកាសឲ្យគាត់ច្រើនហើយ ប្រកាសឲ្យចូលខ្លួនផង ទាក់ទងឲ្យចូលខ្លួនផង ប៉ុន្តែហាជីនៅតែអត់ខ្វល់ គាត់ទទួលទូរស័ព្ទយើងតែម្ដងគត់ ដោយសន្យាថាមកៗ ប៉ុន្តែចុងក្រោយដល់ថ្ងៃកំណត់គឺខលអត់ចូល ហើយទុកឲ្យខ្ញុំ ទាំងមេទាំងអី នៅចាំឲ្យរហង់!”។READ MORE HERE
No comments:
Post a Comment